عشان تفهم القصه والشخصيه لازم تقرأ الاجزاء اللي قبل ومحدش يقوللي عيد كلمه
مغامرات امور الغراميه + امور في الماكدونلديز هههههههههههه
تاني يوم اصحيت من النوم اجى علي صاحبي وركبنا بسيارته وقاللي اسمع انا صارلي يومين
بترجى فيك وببوس ايدك عشان تروح عالحفله وانت متيسه معك وانا كمان تيست معي يعني
اذا ما بتروح عالحفله راح احكي لابوها وافضحك واخليهم يحبسوك فاهم وله؟؟
بصراحه انا متت من الخوف وقلت بعقلي والله هدا بسويها شكله مستقتل يروح عالحفله
ابصر ليش؟؟وخليني أخده على قد عقله احسن يفضحني قلتله انا موافق بس بشرط انك تكون الشفير
والخدام تبعي ومترجعنيش شو بعمل فيك هناك
قاللي وهو مبسوط ولك انت تؤمر امر يللا نروح نحلقلك اول اشي بعدين بفرجها الله
والله نزلنا على سوق الحدادين والنجارين عند ابو العبد الحلاق وشريكه ابو سليم
ابو العبد عمره بيجي 100 سنه وابو سليم متله يعني بجوز حلقوا لفرعون
ابو العبد طبعا مش قادر يقوم راح قال لابو سليم قوم خدلك هالراس
ابو سليم قام طبعا ايديه برجوا معاه مرض الراجوفه وراح طال ماكينه الحلاقه من سطل الكاز
لانه كان ناقعها فيه وبلش يكرت بهالشعر انا حسيت راسي كانه تحت كمبريصه (حفاره) من كتر الرج
وفتحلي شوارع في راسي من الشمال واليمين وفوق وطبعا هو مش قادر يوقف راح قاللي خلص
نعيما هي الحلاقه ولا بلاش مش زي حلاقين اليوم قلتله الله لا يعطيك العافيه يا ابو سليم ولك
هاي حلاقه قاللي ولك انا بحلق للناس ايام ما كانوا يعطوني عالحلقه رطل شعير وانت بدك
تفهمني شغلي؟؟ قلتله والله انت لازم تشتغل بالبلديه بتخطيط الشوارع مش حلاق
المهم صاحبي عجبتوا الحلقه وراح اعطى ابو سليم 10 قروش وسيجارتين
ورحنا على دارهم عشان نلبس للحفله راح لبسني بنطلون كسم ساحل وبلوزه مليانه كتابه
وكندره الها بوز طوله شبرين قلتله ولك هدا لبس هيك الموضه "قال موضه قال"
المهم الا هي سوسو بترن علي وبتقولي حياتي انا بستنى فيك عشان اقولك على مكان الحفله
لاني سويتها بمزرعتنا بره قولتها شو المعازيم خرفان عامليتها بالمزرعه .....
ضحكت ضحكه دوبتني متل حبة البوظه بشهر تموز
قلتلها طيب يا سوسو انا هيني جاي انا وال.........شفير تبعي استنيني
قالتلي حاضر يا روحي
المهم وصلنا سوسو كانت راكبه سياره من هدول الي بيكون العجل فيها معلق من ورا
والله منا عارف شو اسمها ........
واول ما شافتني سوسو قالتلي يااااااااااااااااااي شو هالنيو لوك
اللي بجنن مين هالكوافير الشاطر اللي حلئلك هيك طبعا انا مفهمتش غير كلمه اللي حلئلك
ويااي ففهمت انها عاجباها الحلقه قلتلها والله انا هدا الحلاق تبعي ياباني وهاي الحلقه اخر
موديل اسمها فتحه بالسقف
قالتلي بتجنن بتهوس ياااااااااااااي انا مش مسدئه حالي انك معي يللا الحئوني بسرعه لانه
المعازيم كلهم بستنوا فيك " تخيلتهم الخرفان على طول انا "
قولتلها شو رايك احط سيارتي بطبون "شنتت السياره " سيارتك وانروح ضحكت وقالت بموت بخفة دمك وانا قولت بعقلبي بموت بهبلك .........
المهم وصلنا لبوابه كبيره وفتحولنا الباب ودخلنا وهون بلشت المصايب
سوسو كانت واقفه عالباب مع خمس بنات وكلهم ببحلقوا فيي وبفركوا بايديهم كانه عمرهم
مهمو شايفين واحد متلي مع انه البلد مليانه
سوسو قالتلي بعرفك على نانا صاحبتي......... ولالا......... و فوفو.............ورورو وسكتت عشان اسلم عليهم
رحت قلتلها معرفتيناش عالاخت الخامسه قالتلي لاااا هدا مش بنت هدا ابن عمي "سويلم"
انا صار وجهي احمر ....الله لا يوفقك يا سويلم على هاللبسه وحاطط حومره كمان يا سويلم
المهم انا قلت اذا سويلم هيك معناته انا ارجل واحد بالحفله
والبنات يحكوا يااي بعئد قلت بعقلي انا صاير اعئد زي العئيده وليلتنا شكلها طويييييييييله
سوسو مسكتني من ايدي وقالتلي تعال اعرفك بباقي المعازيم ودخلنا ولحقنا الشفير (صاحبي)
واول ما دخلنا شفت شوفات عجب نسوان لابسين فساطين وجه واحد يعني من قدام في قماش
ومن ورا زي قناه زووم ول عليكم بهاللبس اكيد مسترخصين تدفعوا حق الوجه التاني يا بخلا
واشي مشقوق واشي ممزوع واشي فش اشي المهم انا انعمى ضوي وصابني توهان
في تلت زلام واقفين لابسين بدلات رحت بدي اسلم عليهم الا هم اجو بسرعه وانحنوا قدامي
وسلموا باحترام كبير الا هي سوسو بتقولي يا الله شو جبيتها منك هاي انك تسلم على الخدامين
عاد انا لا عارف خدامين ولا غيرو واجا واحد حامل صينيه مليانه كاسات عصير رحت مسكت كاسه
وكربعتها بسرعه بس حسيت روحي بدها تطلع ولك شو هدا طعمه زي الزفت
قالتلي سوسو هدا براندي قلتلها انا بعرف الميرندي على برتقال مش زي هدا
وصاحبي نازل كبس بهالكاسات الله لا يوفقه والله ماني عارف كيف بشرب هيك عصير
المهم رحنا سلمنا عابو سوسو وصار يجاملني ويحكي حكي حلو بقولي اسمعت انك دارس طب باليابان " طبعا انا كنت كاذب على سوسو اني دارس طب باليابان. قولته: أجل . من جامعة "هاتوا لا اموتوا".... وانا اجيت بدي اقوله معكيش 20 دينار لاخر الشهر
بس قلت لبعدين راح قاللي انا محضرلك مفاجاه راح تعجبك احنا عزمنا السفير الياباني والحقيقه
محدش فينا بفهم ياباني الا انت فبدنا تجامله شوي
انا قلبي سحل لتحت اجريي شو بدي احكي معه هدا رحت شديت صاحبي ووشوشته : ولك
شو اساوي معاه هدا راح قالي مش انت الدكتووووووووور دبر حااااااللك قلتله مالك لسانك صار يحرف على اليمين شكلك زي السكرانين ولك
المهم رحنا عند السفير وطبعا كلهم حواليي بدهم يعرفوا شو بدي احكي معه
السفير قاللي كلمه متذكرها هي سيونارا فرحت انا قلتله ميتسوبيشي هوندا تويوتا
ابتسم السفير وصار يبرطم بحكي لو انه بالعربي بفهموش
فرحت قلتله نيسان سوزوكي اسوزو
طبعا الكل مبحلق فيي وببتسم ومكيفيين اني بحكي مع السفير
السفير بلش يكشر ويبرطم بحكي وانا نازل عد بهالسيارات
اخر اشي قلتله سيوناره تويوتا راح انحني وانا انحنيت وخبط راسنا ببعض
وصار يضحك والناس مكيفين الا هو ابو سوسو قاللي شو حكالك؟
قلتله بحكي انه انتوا ناس كويسين وانه البلد على راسي عاد هو بده يشد شعره
راحت سوسو قالت يا جماعه في كلمه لازم نحكيها كلنا للسفير وهي انت على راسي
بس بالياباني وهي كلمه احيييييييييييه
وكلهم بصوت واحد صاروا يحكوا احييييييييييه احييييييييييييييه احيييييييييييييييه
ابو سوسو قاللي والله لو انت مش موجود كان ما عرفنا ندبر حالنا بصراحه انا فخور كتير فيك
لانك رفعت راسنا وبما انك دكتور تعال اعرفك على اكبر مستورد للادوات الطبيه بالشرق الاوسط
فرحنا سلمنا على هالزلمه الجديد قاللي اهلا يا دكتور توتي انا سمعت عنك وحابب اتعرف عليك
قلتله أحيييييييه قالي وانتا كمان على راسي.......
قاللي والله انا حابب اجيب اجهزه لغسيل الكلى للبلد وبما انك دكتور ودارس باليابان فاكيد عندك
كل المعلومات عن الموضوع
انا بصراحه كيفت قلت بعقلي اجا واحد يحكي باشي بفهم فيه فرحت طاعج تمي على جهه
وقلتله في الواقع اهم اشي بمغاسل الكلى ...السيفون....يعني احنا ركبنا مغاسل للكلى
وبغسلوا عليهم مش بس الكلى بغسلوا القلب والمعده والمعلاق كله
قاللي رائع جدا ووين هادا؟؟
قلت ماله الاهبل هدا بس بلاش اكون خبصت فرحت حكيتله باليابان
قاللي اليابان فيها قمه التكنولوجيا واكيد عندهم اخر ما توصل اليه العلم في غسيل الكلى
قلتله طبعا اصلا هلأ ما في غسيل كلى لانه كله حولوه دراي كلين
راح حط ايده على كتفي وقاللي اسمع انا حابب اعمل معك بسنز شو رايك؟
انا مسكت ايده وزحتها وقلت هدا الزلمه مريض نفسيا ولك شو بتفكرني يا ابن اللزين
قلتله هسا ما شفت غيري تعمل معاه بسبس الا انا ولك هي سويلم متحومر وجاهز
قاللي سويلم ما بنفع مش تبع بسنز بس انت شكلك فاهم كل اشي بعدين اذا على الفلوس
ولا يهمك ما بنختلف
قلتله ابعد عني بلاش ارتكب جريمه.........
والله واحنا بنحكي ولا في صوت بصرخ وبقول دكتوووووووور يا جماعه بدنا دكتووور
بكملكم القصه المره الجايه هههههههههههههههههههههه
27.02.20 21:09 من طرف mostafa magdy
:P
